[SIZE="4"][CENTER]نسيت المفتاح


قبل ما دماغى تهسس واخش عالم الهسس ، حصلتلى حكاية قلت احكيهلكم

فى مرة من المرات كنت مستعجل قوى وعاوز انزل من البيت بسرعة عشان الحق معاد الشغل وخت فى وشى وجريت على ملى وشى ولحقت الميكروباص اللى هايوصلنى للشغل وبعد تعب القلب فى المواصلات قدرت اوصل الشغل متأخر ساعة ونص...ودا فى حد ذاته انجاز

المهم اندمجت فى الشغل وعدا الوقت ،ودقت ساعة المرواح ونزلت من الشغل عشان اروح البيت ،وبدأت رحلة تعب المواصلات تانى ، ووصلت لباب العمارة اللى ساكن فيها وانا بطلع السلم بطلع مفتاح الشقة من جيبى عشان اخش بيتى بقى واستريح من تعب اليوم الطويل دا!! ...اتفاجأ ان المفتاح مش فى جيبى




يمين ...شمال ..ادور فى كل الجيوب ..فى المحفظة..مش لاقيه

افتكر انا اخر مرة حطيته فيين؟؟ مش فاكر

قلت اروح المكتب تانى يمكن نسيته هناك؟؟ وركبت المواصلات تانى ورحت الشغل ولقيت الشركة قفلت فرحت متصل بالفراش بتاع الشركة لأنه معاه مفتاح الشركة ..قالى انا خلاص روحت.. قلتله معلش انزل دلوقتى اصل شكلى نسيت مفتاح الشقة بتاعتى فى الشركة ...والراجل جه على نفسة ونزل

واقعدت ادور انا وهو فى كل الشركة..بردوا ملقتش المفتاح

المهم رجعت البيت تانى..ووقفت ادام باب الشقة وانا مليان هموم الدنيا وتعبان ..وعاوز اخش الحمام واخد دش واستحمى من العرق وزحمة المواصلات



فكرت انزل اجيب واحد نجار عشان يكسرلى الكالون بتاع الباب.. وفعلا نزلت ادور على نجار وطلعت عينى عقبال ما لقيت واحد عبرنى وجه معايا

وبدأ الراجل فى عملية تكسير الكالون..المهم الراجل طلع غشيم شوية وكسر جزء من الباب مع الكالون..المهم كل دا يهون عشان اخش شقتى واستريح فى بيتى

المهم دخلت وأول حاجة عملتها روحت على الحمام عشان افضى الهموم اللى كانت ركبانى دي
وبعد ما خت دش وطلعت واستقريت وبحضر لقمة عشان أكلها...لقيت الجرس بيرن ..كشاف النور
جاى يكشف عن قراية العداد ويحصل الشهر
روحت اجيبلوا الفلوس من جيب البنطلون..وانا بعدلوا الفلوس
لقيت المفتاح مستخبى بين الفلوس



وقفت مندهش ومستغرب
وقلت..دا انا غبى بشكل !! كل دا وانت فى جيبى
يا أخى حرام عليك دوختنى

وبعد ما الواحد هسس ودخل عالم الهساسين...أول ما دخلت ..الهساس الأعظم ادانى شقة وعليها عربية ملهاش مفاتيح ...شغالة ببصمة الصباع والصوت، وكل دا عشان الهسايسة ما تشلش هم نسيان المفتاح وتبقى متعلقة برة بيتها ..ومش عارفة تعمل حاجة فى دنيتها وتبقى عاملة زى المشلولة، وكمان ياخد الهسايسة مع الشقة والعربية كل حاجة يحتاجها الهساس فى يومه من اكل وشرب وترفيه.. كل دا مجانى

كل دا عشان الهساس يعرف يتفرغ للهسس وبس وازاى يفيد العلم دا من افكاره المتهسسة
وفى عالم الهسس..ما فيش مفاتيح تتنسى
فى حالة واحدة بس الواحد ممكن ما يعرفش يخش شقته
ان صوابعو تتقطع وصوته يروح

المصدر: مدونة علم الهسس
XXXXXXXXXXXXX