الشُبــّاك



كل واحد فيينا عنده شبابيك فى بيتهم وطبعا الواحد مننا بينظر للشبابيك على أنها معموله فقط للتهوية والإضاءه ، ولكن ينظر علم الهسس الى الشبابيك بنظرة أكثر تعمقاَ ووضوحاَ ولتوضيح ذلك نطرح هذه الأسئلة:-
ليه الواحد لما يكون جوا البيت وقاعد جنب الشباك يسرح ويفضل باصص من الشباك؟
ليه الواحد بيحب يقعد كتير فى البلكونة؟؟
ليه الواحد لما يركب اى مواصلة بيحب يقعد جنب الشباك؟؟
ليه الواحد لما تحصل حريق اول حاجة يفكر فيها انه ينط من الشباك؟؟
ليه عملوا نظام تشغيل الكمبيوتر عبارة عن شبابيك؟
ليه لما جوم يسموا مكان قطع تذاكر فى اى مواصلة او تذاكرالسينما سموه شباك تذاكر؟؟
ليه الواحد لما يروح البنك او اى مصلحة يلاقى الموظفين قاعدين ورا شبابيك؟؟
فى حاجة مشتركة فى اجابات هذه الأسئلة وهى



ان الشباك بيكون المنفذ الوحيد لرؤية العالم الخارجى زى ما تقول كدا ان الواحد مخنوق وبيدور على الحرية و حاسس انه مسجون وعاوز يتحرر من هذا السجن ويطلع للدنيا الواسعة او بمعنى اخر ان الامكانيات المتوفرة للواحد مننا داخل الشباك بتبقى أقل من اللى متوفرة خارج الشباك زى ركوب مركب فى النيل او رحلة لاحسن مكان فى الدنيا وتخليص المصالح ...الخ كل دا بيحصل برا الشباك



وحاجة تانية هى إن الشباك بيكون فاصل بين الموظفيين والناس عشان ما تحصلش خناقة وتحصل خسائر فى الأرواح وتتعطل المصالح بتاعت الناس


البحث عن الحرية ...وفض الاشتباك
دا الهدف من وراء الشبابيك
المصدر:مدونة علم الهسس
http://alhasas.blogspot.com/