اوعى ...ابو 2.5



بعد ما سجلت اختراعى "شفاط الشجاعة" سنة 2200 م ادتنى الشركة اللى انا شغال فيها جائزة لم اتخيلها ادتنى كوبون مفتوح اشترى بيه اى حاجة من اى مكان ومن اى محل نظرا لهذا المجهود اللى بذلته فى خدمة الهسس ،

وقعدت افكر فى الحاجات اللى كنت بحلم بيها طول عمرى زى عربية اخر موديل ، فيلا فى مكان بعيد على البحر، صاروخ اروح بيه القمر، وحاجات تانية كتيرة كتبتها فى ورقة ونزلت عشان ادور على اللى انا عاوزه ، وانا ماشى لقيت محل مكتوب عليه كل حاجة بــ 2.5 عربيات اخر موديل ، فيلات ، مكوك فضاء، ناطحات سحاب كل اللى انت عاوزه هاتلاقيه عندنا


بصيت فى القايمة لقيت حاجات من اللى عاوزها موجودة فى المحل ، دخلت بسرعة واتعقدت على العربية والفيلا والصاروخ طبعا بالكوبون ولقيت الناس هاتشيلنى من على الارض شيل ، المهم قالولى الحاجات هاتبقى جاهزة خلال اسبوع عشان الطلبية بتروح المصنع ويتم تصنيعها قلت ما فيش مشاكل
وقعدت منتظر على احر من الجمر اخيرا هاحقق بعض احلامى ، فعلا احنا فى عصر السرعة الفائقة وجاتلى الطلبية عربية حقيقية ، وفيلا على البحر ، وصاروخ والراجل سلملى الكتالوجات الخاصة بكل طلبية وقريت التعليمات كويس وذكرتها كويس وخدت فيها يوم كامل ، وفى صباح اليوم التالى بدأت استخدم العربية ورحت بيها الشغل وكانت ممتازة
ورحت عشان اجرب الصاروخ فى اليوم التالت عشان اعمل زيارة للقمر لقيته اتحول الى صاروخ لعبة مع انى استلمته كبير وعلى منصة الانطلاق ، وشوفت الفيلا والعربية بردوا حصلهم نفس الحكاية

قلت فى نفسى اكيد فى حاجة فيها بتخليها بتكبر ....التكنولوجيا بتعمل العجب وقعدت العب فيها عشان اشوفها بتكبر منين وللاسف معرفتش
رفعت سماعة التليفون واتصلت بالمحل وحكتلوهم الحكاية .... قالى فعلا الحاجات بتاعتنا بتتحول الى ماكتات بعد 2.5 يوم .



لأن العربيات والصواريخ والفيلات بأت مش موجودة من 50 سنة فاتت ، وبقى فى حاجات جديدة غيرها ، واحنا بنعمل دا من قبيل الحنين الى الماضى وانت لو رجعت الى التعاقد هاتلاقى بند بيقول التفاصيل دى كلها

احلامى طلعت لفوق .. لفوق وبعد كدا سبتنى اقع على الارض لوحدى
وقلت فى نفسى هو انا مش عايش فى الدنيا ولا ايه؟ أحلامى بأت متأخرة كدا ليه؟
المهم فى الاخر عشان ميجليش احباط قلت " هو انا دفعت حاجة من جيبى ... كله بالكوبون"
وخت العربية والصاروخ والفيلا وحتتهم فى دولاب الذكريات



ونصيحة منى ما حدش يدلأ على الفرص، عشان ممكن تطلع فشوش

المصدر: مدونة علم الهسس
http://alhasas.blogspot.com/