السلام عليكم ورحمة الله وبركاته
عندما سنقف يوم القيامة بين يدي الله عز وجل ويسأل كل مسلم :
ماذا فعلت كي تحرر فلسطين
ان شالله نقدر نلاقي جواب لهالسؤال
مشان هيك نحنا لازم من هلأ نفكر شو بدنا نعمل وكيف بدنا نقوم بواجبنا تجاه الشعب العربي الفلسطيني

انا ما عم قول أنو لازم نحمل سلاح ونروح نقاتل بفلسطين ولا عم قول نفجر ونحرق سفارات , نحنا فينا نجاهد بشيء أعمق من هيك بكتير

هلأ يمكن تفكروا قصدي هو الجهاد بالمال مو بالنفس
الجهاد بالمال شي كتير عظيم وبتصور كلياتنا عنا استعداد نتبرع لفلسطين لما نكون ضمنانين أنو هالتبرعات رح تصل
بس للأسف ما حدا متأكد اذا كانت عم تصل ولا لا
هلأ رح تقولوا لكان شو بدها هي؟

نحنا رح نقوم بواجبنا بطريقة سلمية وانسانية كتير وبدون ما نقاتل وبدون ما نعمل مشاكل
أكيد كلياتنا منعرف نحكي لغة عالمية سواء فرنسي أو انكليزي
وعدد كبير مننا بيعرف يعمل محادثات باحدى هدول اللغتين
نحنا اذا مناخد الرأي العام العالمي منلاقي معظم الناس متضامنين مع اسرائيل ومتعاطفين مع اليهود
طيب ما سألنا حالنا شو السبب؟
مو لأنو هدول الناس مو مناح ومو لأنون بيكرهوا العرب
بس لأنو الإعلام الأميركي والإسرائيلي قدر يلعب دورو ويستقطب المشاعر العالمية نحوه ويبين أنو الاسرائيلييين المحتلين هنن شعب مظلوم ويبين أنو الون حق بأرض المقدس ويصور العرب والمسلمين بصورة كتير بشعة انون ناس ارهابيين وأنو هنن اللي محتلين أرض اليهود وليس العكس

انا عندي كتير مقالات وصور عن الوحشية الصهيونية والأميركية بالسجون وبفلسطين وأفغانستان والعراق وكل مكان في العالم في بصمة الون من بصماتون الدموية انا عندي كتير عن هالشغلات

هلأ كلياتنا منعرف اسرائيل وأميركا على حقيقتهون
بس المشكلة أنو العالم الغربي ما بيعرف هالشي
لذا اذا نتفق ومنعمل فريق ترجمة لترجمة هي المقالات إلى اللغات الأجنبية ومننشرها بالمنتديات الأجنبية (أنا بتصور أنو المنتديات عندون بتتمتع بحرية فكرية يعني شو ما بتنزل بناقشوك وبحاوروك وما بيحذفولك ردودك أو مواضيعك السياسية) وهيك منحاول ننقل الصورة الصحيحة للعالم الغربي بعيدة قدر الإمكان عن التشويه

أو ممكن اذا ما لقينا منتدى غربي مناسب وفيو عدد كبير من الناس وبيحكي عن السياسة العالمية ممكن نحنا نعمل موقع نصممو نحنا ونحط فيه الأفكار الصحيحة ونعملو دعاية للغرب (كيف الدعاية هي لا تسألوني لأنو ما بعرف)

هلأ ممكن نحنا نأثر بالشعب الغربي وهالشي ممكن يأثر عالاعلام الغربي عالمدى البعيد (يعني بعد شي كم سنة أكيد مو دغري التأثير)

وهيك منكون عملنا شي (ولو أضعف الايمان) وكمان منصمم عروض نحنا ومنترجم اغانينا الوطنية للغات أخرى وممكن نعملها فيديو كليب مترجم يعني ممكن نحنا نعمل كتير شغلات عالصعيد الاعلامي ونأثر بشعوب العالم الأخرى
عالقليلة اذا ما أثروا عالاعلام تبعهون ممكن يساهموا بارسال مساعدات لفلسطين لأنو متل ما بتعرفوا المساعدات من الدول الغربية أسهل أنو تفوت على فلسطين بشكل أكبر من المساعدات من الدول العربية


بقا شو رأيكون؟؟؟


حالياً بدنا فريق ترجمة يلي مستعد يرفع ايدو