اريد ان اوقع ابعاد بالتوتال اشتيشن وليس لدى اى نقط ثوابت فى الموقع ولا اى نقط احداثيات كى اعمل منها resction فهل ينفع ان اشتغل local system وهل تكون الدقه عاليه وارجو شرح طريقه local system هنا
وشكرا للمنتدى الرائع

هو مفيش حد فاهم السؤال ولا مفيش حد عارف اجابه

يا اخ محمد - يبدو ان الاخوه شايفيين ان السؤال ده ما يتسألش - لانه بصراحه بدائى جدا - وان كان راى الشخصى ان مش عيب ان الواحد يسأل و مش عيب ان اى مساح عنده خبره متوسطه يجاوبك

على العموم - طبعا ينفع تشتغل من Local System - ده الشئ الطبيعى جدا - وطبعا الدقه (دقة التوقيع و دقة الابعاد) هى نفسها لو وقعت الابعاد من Local System او حتى من عفريت سيستم - المهم ازاى حتعمل الـ Local System , و ازاى حترصده.

مبدئيا - تثبت نقطه فى الموقع بره حدود الشغل تثبيت جيد ( يعنى سيخ مدقوق فى الارض بشكل جيد جدا و حوله الخرسانه او الطوب )

تحتل هذه النقطه و تفرض لها احداثيات و هميه مناسبه ( يعنى 5000 و 5000 و 100 ) و تدخل احداثيات هذه النقطه للجهاز.

تستخدم بوصلة الجهاز و تحطها على الجهاز و تلف الجهاز لحد ما يكون فى اتجاه الشمال (المغناطيسى طبعا ) و تبص فى المنظار فى هذا الاتجاه و تثبت نقطه ثانيه على اتجاه خط النظر تبعد عن الاولى حوالى 200 او 300 متر ( ده اذا كان الحاجات اللى حتوقعها فى دايره قطرها 300 متر ) او اكبر ( حسب قطر الدايره )

بعد ما تثبت النقطه الثانيه كويس - تعتبر ان الاتجاه من النقطه الاولى الى النقطه الثانيه هو اتجاه الشمال.

تبدأ الشغل : عندك دلوقت نقطه لها احداثيات اللى هيا انت واقف عليها - نقطه 1 - و اتجاه من نقطه 1 لـ نقطه 2 - اللى هوه اتجاه الشمال دلوقت - تعمل توجيه للجهاز او حسب ما بيسموها ( orientation ) من 1 الى 2 و تديله انحراف الخط ده 0 - و بعدين ترصد النقطه الثانيه و تجيب احداثياتها .

و متناس انك تكون مدخل ارتفاع الجهاز و ارتفاع الـ Prism

و علشان تتاكد حتلاقى ان احداثيات ال x او E بتاعة النقطه الثانيه هى نفسها احداثيات النقطه الاولى و احداثيات الـ y او الـ N هى عباره عن احداثيات النقطه الاولى + المركبه الافقيه للمسافه بينهم

دلوقت عندك نقطتين لهم احداثيات XYZ - تقدر توقع منهم او تعمل Traverse منهم - بس هو السؤال المهم حتوقع ايه ؟؟ - هو انت عندك نقط لها احداثيات - و اضح ان قصدك ترفع مش توقع !!!

ده هو كل الموضوع ببساطه - و ياريت الاخوه اللى بيقروا الرسائل يبطلوا سياسة خد الفلوس و اجرى و يردوا على اسئلة زملائهم - خصوصا لو كانت بسيطه.

عفوا - يا اخ محمد - نسيت اقولك ان المسافه بين النقطه الاولى و الثانيه ممكن تكون اقل كثير - يعنى ممكن تبقى 20 او 30 متر - ده حسب طبيعة الشغل - يمكن انا كتبت الارقام الكبيره علشان ده الى بيحصل عادة فى مواقع البترول - حيث الصحراء ممتده و مسافة 3 او 4 كيلو دى فركة كعب !!

ليكن في علم الأخ السائل أن total station أو أي جهاز لقياس المسافات تكون دقته متعلقة بأبعاد المساحة المراد رفعها فاذا تجاوزت الأبعاد مسافة 3 كم مثلا فان كروية الأرض والعوامل المناخية ستؤثر في دقة القياسات و ستلاحظ ذلك اذا أردت الانتقال من local system to general system(UTM,Lambert وهذا اذا كان لديك معطيات الانتقال .
واذا أردت القيام برفع منطقة محددة لا تحتاج الى ربطها ب general system فانه بامكانك القيام بالعمل كما شرح الأخ أشرف و لكن دون الحاجة الى تثبيت النقطة 2 ذلك لأنه يكفيك احداثيات نقطة 1 واتجاه معين اتجاه الشمال مثلا والله الموفق

اشكر الجميع على الرد والاهتمام وبالنسبه للاخ - اشرف - اشكره على الاجابه بالشرح الجميل ولكن هو مش رفع ولكن توقيع ابعاد على (rega او ما يسمى جنزيره ) وطبعا فى اتجاه الشمال والشرق وارجو التواصل معى اخ اشرف لان لسه مبتدأ فى المساحه

الاخ محمد - لا - فيه حاجه مش مظبوطه.

مادام حتستخدم نظام الاحداثيات - يبقى لازم ترفع الاول اركان الخنزيره الاربعه و تعرف احداثياتهم - و بعدين ترسمهم ( على الاتوكاد مثلا ) بالاحداثيات كمستطيل و بعدين ترسم المحاور الانشائيه و التفاصيل الاخرى المهمه و تركبها على رسمة هذا المستطيل.

و بعدين تركب اللوح المختلفه على هذه المحاور: لوح القواعد - ثم لوح الاعمده - و هكذا

و بعدين تطلع احداثيات النقاط اللى انت عاوز توقعها من على اللوحه و تذهب الى الموقع و توقعها.

و هناك حل اسهل جدا - مش عارف ليه ناس كتير بينسوه - لو كنت عاوز توقع محاور الاعمده و القواعد بس.

انسى تماما موضوع الاحداثيات و اعتبر التوتال ستيشن جهاز تيوديليت دقيق و سهل التشغيل و عليه و حدة قياس مسافات دقيقه وو قع المحاور ببساطه زى زمان.

اشكرك اخ اشرف على التواصل معى
انا فعلا عاوز اوقع محاور وقواعد وبالنسبه للتوقيع كل ده سهل بالنسبه ليه وعارف موضوع رفع الخنزيره ورسمها على الاتوكاد المهم الى انا عاوز اعرفه كيفيه تظبيط السستيم يعنى ( station &back) لتوقيع هذه المحاور والقواعد وبالطبع معايا ابعادهم يعنى لو هوقع بعد من الابعاد هيكون ( (0,65 )& (65,0) وبالنسبه لموضوع تحويل التوتال الى تيوديليت فكره جكيله بس برده موضوع تظبيط السستيم ارجو ان تفهمنى
وشكرا على الاهتمام والتواصل معى اخ اشرف

الاخ محمد
- ثبت النقطتين اولا كما شرحت (ولتكن المسافه بينهم 30 متر مثلا ).
- ارصد النقطه الثانيه ( كما سبق شرحه ) - و سجل احداثياتها ( حتكون مثلا E= 5000 و 5030.254 = N , الـ Z = 100.123 )
- ارصد احداثيات الاربع اركان للريجه - و سجل احداثياتها ( حتكون دائما 5000 و امتار للـ E و كذلك 5000 و امتار للـ N لاى نقطه )
- ثبت على الريجه مسمارين (واحد على الجنب اليمين وواحد على الجنب الشمال ) يمثلوا اول محور - طبعا اختيارهم بيكون زى ماتكون بتشتغل بالشريط الصلب - الريجه خارج حدود الحفر متر - و حدود الحفر خارج حدود العاديه 0.5 متر و العاديه خارج حدود المسلحه حسب الرسومات - و حدود المسلحه تبعد كما فى الرسومات ) تجمع كل دول و تدق مسمار على الريجه على اليمين و مثيله على الشمال
وترفعهم ( برضه احداثياتهم حتكون 5000 و امتار
- ارسم كل ده على الاوتوكاد
- من اول محور رفعته ارسم موازيات و اعمده عليه ( زى اللوحه الانشائيه بالظبط)
- احداثيات نقاط التقاطع هى اانقاط المطلوبه
- يتم توقيع النقاط

و هناك ملاحظه مهمه جدا انت لفت نظرى لها يا اخ محمد - فى امريكا بالذات - علشان تاخد شهادة ( او ترخيص ) Professional Licensed Surveyor او ماترجمته مساح محترف معترف به فى اغلب الولايات مش لازم بس تبقى اتعلمت فى معهد او كليه و لكن لازم ان يتم الاتى :

- اولا تكون درست فى معهد او كليه بعد الثانويه (بيسموها هناك الـ High School ) - و يكون فى دراستك مناهج مرتبطه بالمساحه.
- تكون اشتغلت عدد معين من السنين ( 4 او 6 سنوات احيانا ) منهم على الاقل( 2 او 3 احيانا ) تحت اشراف مساح محترف مرخّص ( معترف به ) و تكون حاصل على شهاده بذلك.
- تمتحن امتحان الترخيص و تنجح فيه و الامتحان بيبقى نظرى و عملى .

و بعد ما تحصل على الرخصه - و تحاول تبتدى تشتغل فى الحاجات الجامده ( بحق و حقيقى ) - تدور على شركة تأمين ترضى انها تأمن على رخصتك المهنيه - يعنى لو حصل خطأ نتيجة شغلك - مش حتترفد و بس حيرفعوا عليك قضيه و ياتدفع تعويضات عن غلطك - يا تخش السجن - و طبعا اقل شركة تأمين متهاوده حتاخد 30% من اتعابك او مرتبك !!

فمهم جدا جدا - انك تشتغل تحت اشراف واحد محترف و امين - لان من راى ليس كمن سمع و من فعل ليس كم رأى.

ارجوا ان تكون الامور واضحه لك الان.

و شكرا

اخ محمد تحياتي
لا تستطيع تثبيت مواقع وابعاد على اي موقع دون ربط احداثيات القرائات الجديدة بالاحداثيات القديمة او اذا لا يوجد احداثيات لاسباب معينة يجب ربط النقاط الجديدة والتي لها احداثيات بالنقاط القديمة واعتبار الاحداثيات الجديدة احداثيات النقاط القديمة وثم يتم تنزيل الابعاد كما تم الشرح من اشرف وغيره
املا ان تكون قد استفدت

شكرا على الردود والاهتمام من جميع الاخوه
بالنسبه للاخ -الياس قمصية - انا مش فاهم تقصد ايه ممكن تفهمنى وجهه نظرك

رسالتي واضحة جدا قمت للتو بمراجعتها

أخي محمد
أنصحك بأن ترسم Sketch تقريبي بالأوتوكاد بالموضوع وتحمله بملف حتى يتم فهم السؤال بشكل جيد
وأيضاً يتم الجواب عليه بدقة ومفيش حاجة صعبة باذن الله
وربنا يوفقك

السلام عليكم
اشكر الاخ -عزمى - على الرد والمشاركه وبالفعل قمت رسم تقريبى بالاوتوكاد لجميع المحاور وبعض من القواعد وليست كامله بسبب ضيق الوقت
والشكر كل الشكر لجميع الاخزه الذين قامو بالردود
وكل الى طلبه ماذا اعمل فى هذه الحاله اذا لم يكن موجود نقط ثوابت باحداثيات معروفه فى الموقع
وشكرا للجميع

الملفات المرفقة

Drawing.zip‏ (11.0 كيلوبايت, المشاهدات 19)