السلام عليكم..

والله يا جماعة أنا ما سافرت واشتغلت بالخليج، بس شفت يلي سافروا واشتغلوا هنيك، يعني ما متنا بس شفنا يلي ماتوا (مثل شامي)...
أنا بظن إنو السبب الأول والأخير بتدني الرواتب بدول الخليج هو لحنا، يعني طالما في مهندسين عم يطلعوا على متل هيك رواتب متدنية (وخاصة من المتخرجين حديثاً) معناتها ليش ليزودوا الرواتب؟؟؟، يعني هنيك لو بيصحلهن مين يشتغل عندهن ببلاش ما بيقولوا لاء..
ومن جهة تانية ما منحسن نلوم اللي عم يقبل بهالعروض كتير، يعني بيتخرج من هون، وبينشحط فوراً عالجيش من هون، مو كتير (بس سنتين)!!! بأ بيقول لحالو الواحد (لا والله بتغرب خمس سنين قد ما كان الراتب، وبجيب بدل الخدمة العسكرية، والله بيعين من هون لوقتها)...

يعني والله الواحد ما بيعرف شو بدو يحكي... من وين بدو يلاقيها ليلاقيها؟؟؟ يعني بيهرب من تحت الدلف لتحت المزراب..

يا جماعة أنا ما عم اشتكي (مستورة والحمدلله)، والحمدلله دفعت بدل داخلي وخلصت من هالمشكلة، وما عدت مضطر سافر إلا إذا الله سبحانه وتعالى كتبلي السفر... مين بيعرف شو الله كاتب؟؟؟