الحلقة السابعة
استيقظت منتفضة على رنين المنبه المزعج وإعلانه الساعة السادسة والنصف صباحًا وشعرت بألم في كل جسدي ، فأنا لم أنم سوى ساعتين بعد صلاة الفجر التي صليناها أنا وعمر .
واليوم هو أول يوم نعود فيه للعمل ، وطبعًا عمر ولا على باله فعمله قريب من منزلنا الجديد تقريبًا ربع ساعة بالسيارة ، أما أنا فيبعد حوالي ساعة وربع في أفضل الظروف ، ولم أكن أشعر بهذا من قبل ؛ بل كان قريب من منزل أبى وأمي أما الآن فلازم ألف الكرة الأرضية علشان أوصل عملي .
والأسوأ أن عمر لن يستطيع توصيلي ، لأن جهة عملي وجهة عمله مختلفتان تمامًا فلو وصلني أولاً ... سيصل هو عمله بعد أذان الظهر وسيرفدوه بإذن الله ونشحت على باب السيدة زينب !! بعد أسبوع على الأكثر !!! إذن لا مفر من حرب المواصلات الرهيبة أن أخوضها وحدي ، ولا أستطيع حتى الشكوى لأن عمر من البداية غير موافق على عملي ولكني أصريت ، فلا أستطيع حتى التنفس بكلمة واحدة .
الحمد لله أنا لا أفطر يعنى سوف أقوم وأرتدي ملابسي بسرعة جدًا ، وأجرى لألحق بالميكروباص الشيك جدًا لعلى أصل في موعدي في أول يوم مش ضروري كرامتي تتبعثر من المدير ، وأنا عروسة كده !!! .
ارتديت ملابسي على عجل وأخرت إيقاظ عمر إلى آخر لحظة كي ينام قليلاً ... وبعد إتمام ملابسي وارتدائي الحجاب ، والشنطة كمان اقتربت منه وقبلته في جبينه ، وهمست له ( يا حبيبي ... اصحى بقى كفاية كسل !! ) .
- صباح الفل يا حبيبتي ... أيه ده أنتِ لبستِ بسرعة كده ؟! كان نفسي أوصلك بس بعون الله لما نلف القاهرة كل يوم حنترفد أنا وأنتِ جماعة !! .
- ولا يهمك يا حبيبي أنا قدها وقدود ... على فكرة حتوحشنى لحد ما أرجع .. يا لا مع السلامة أحسن كده أتأخرت ! .
- وأنتِ أكتر يا حبيبتي بس متى لحقتِ تحضري الفطار ؟ أنتِ صحيتي متى على كده ؟
- فطار ؟!!! أيه الكلمة الغريبة ديه ؟ ما أنت عارف أنى مش بفطر يا حبيبي ؟!! وبعدين مفيش وقت خالص !! .
- فرد بعناد : بس أنا بقى بفطر وخصوصا قبل ما أروح الشغل لازم أفطر فطار متين علشان مش بأكل برة وبأفضل عليه لحد ما أرجع.... والدتي كانت معودانا على كده !! .
- رديت في سرى وأنا أنظر للساعة ( الله يسامحك يا حماتي أي حاجة حلوة تبقى من ناحيتك على طول !! ) طيب والفطار المتين ده يبقى أيه يا سيدي ؟
- عادى زى كل الناس بيض مسلوق ، أو عجة ، وطبق فول بالزبدة ، ولانشون وجبنة ، وزيتون ، وزبادى ، وطبق خضار كبير خيار وطماطم وخس متقطعين شرايح رفيعة خالص وطبعًا كوب حليب وبعدها شاي وخلاص !! .
- يا خبر أبيض ده لو كل الناس بتفطر كده ممكن تحصل مجاعة في البلد .. وبعدين اللي أنت بتقوله ده عاوزله ساعة على الأقل وأنا متأخرة يا عمر !! .
- رد بعناد أكبر : ما أنا قلت الشغل مش ح ييجى منه غير وجع القلب .. يعنى أنتِ عاوزانى أنزل من غير فطار يا سارة !! .
- ( لا إزاي أترفد أنا في داهية ؛ علشان تفطر الفطار المتين يا سيدى !! ) قلتها في سرى طبعًا ، وأنا أكاد أبكي ، وأنا متجهة إلى المطبخ لإعداد وليمة الفطار لسي السيد !! .
توجهت إلى المطبخ ، وأنا أجرى مثل البهلوان أضع البيض على النار ، وأقطع الخيار ، وأخرج الجبنة من الثلاجة وأسخن الفول وووووووووو إلخ ... مش ممكن كل ده هياكله أبدًا !! .
ده أنا طول عمري أتريق على المسلسلات التي تجعل جميع الأسرة صباحًا يجتمعون على مائدة الإفطار ؛ وعليها عشرة أصناف على الأقل وكان يستفزني جدًا طبق البيض المسلوق الموضوع به 40 بيضة والشاي لابد أن يكون مقدم في طقم كامل البراد والسكرية ، وخلافه يعنى لازم الزوجة علشان تعمل الهيصة ديه كلها تبتدي تحضر الفطار من أذان الفجر تقريبًا أو ما تنامش أسهل وخلاص علشان الباشا يفطر الفطار المتين !! .
أخيرًا انتهيت ووضعت الأطباق على السفرة وكان الباشا بيقرأ الجريدة بمنتهى الرواقة وصببت الشاي ، فصرخ وأنا أصبه ( لا يا سارة أنا قلت لكِ الحليب الأول وبعدين الشاي !! ) .
فنظرت إلى ساعة يدي وجدتها الثامنة إلا ثلث فكدت أبكي ، فلم أرد أن ابدأ اليوم بخناقة فرديت عليه من تحت أسناني ( معلش يا عمر فيه شاي تاني كتير ... أنا نازلة بقى أصلى أتأخرت جدًا جدًا ) .
- طيب يا حبيبتي افطري الأول !! .
- حبيبتك ؟!!! طيب سلام يا عمر .
ونزلت من العمارة وأنا أجرى تقريبًا ، وأكيد البواب قال يا عيني ديه العروسة الجديدة الظاهر واخدة علقة على الصبح وهربت من العريس !! .
مشيت مسافة طويلة حتى موقف الميكروباص لأن الميزانية لا تسمح بتاكسي بالطبع !! ، وانتظرت طويلاً حتى وجدت مكان فاضي وركبت وسرحت في الطريق وأنا أفكر أن هذه هي البداية الجادة للزواج لابد فيها من تعب وإرهاق ومسئولية كبيرة ... الله يكون في عونك يا ماما طول عمرها بتشتغل وعمرها ما أشعرتنا بأي تقصير .
أنا كان مالي ومال الحدوتة ديه ما كنت مريحة دماغي ، ولا فطار متين ، لا مواصلات ولا بهدلة !! بس أيه البديل ؟ الوحدة ؟ الصمت ؟ الفراغ والاكتئاب ؟ العنوسة بكلمة أشمل ؟ لا طبعا مهما بذلنا من جهد في دائرة الزواج أفضل بكثير جدًا من الراحة خارجه ، ربنا يخليك لي يا عمر وتفطر كل يوم !!! بس ربنا يستر من المدير وغلاسته – غفر الله له - !!! .
أهلاً يا سي عمر .... أيه يا عم جاي في ميعادك تمام ... ألف مبروك يا عريس ايوة كده وشك نور على الجواز !!! يالا يا سي عمر احكي لنا كل حاجة بالتفصيل !! ولا أقول لك بلاش أنت أيه رأيك الجواز حلو ، ولا زى ما بنسمع من الرجالة ؟
يا سيدي الله يبارك فيك ، والله الجواز ده أكبر نعمة للرجل واللي يقول غير كده يبقى جاحد للنعمة بصراحة .
يا عم ، يا عم طيب يا سيدي ربنا يسعدك لما نشوف رأيك أيه بعد سنتين !! .
- ألف مبروك يا عروسة ناموسيتك كحلي متأخرة ساعة بحالها طبعًا يا ستِ مين قدك ده أنتِ حتى شكلك ما نمتيش كويس .. طبعًا يا ست العرايس ربنا يسعدك .
يالا بقى احكي لنا كل حاجة بالتفصيل الممل .... إلا صحيح يا سارة العريس لازم يحضر الفطار لعروسته بنفسه ؟
- ايوة طبعًا لازم يحضر لها فطار متين كل يوم !!!!!!!!
وطبعا استدعاني المدير وأخذت كم لا بأس به من الكلام البارد على تأخيري وتلميح على أن لو كان الجواز حيغيرنى ، يبقى أقعد في بيتنا أسهل أقشر بصل !!
يا حبيبتي يا سارة وحشتينى الكام ساعة دول ... لما أبعت لها رسالة علشان تعرف أنى
بفكر فيها ( يا ترى يا قمر بتفكري فيا زى ما بفكر فيكِ ؟ ؟ ) .
فردت على الفور ( أنا كمان بفكر فيك يا حبيبي وقلقانة عليك من طن الأكل المتين اللي أكلته الصبح ... ربنا يستر وما تاكلنيش وأنا نايمة !!! ) .
وأخيرًا انتهى اليوم الساعة الثالثة وعمر ينتهي من عمله في الخامسة ياااااااا رب ألحق أوصل بسرعة وأحضر الغداء .... ورجعت في نفس رحلة العذاب الصباحية في المواصلات ولكن مع الحر والرطوبة ما شاء الله ما أقدرش أوصف شعورى .
وصلت بيتي الساعة 4 وتلت تقريبا يعنى ساعة وعمر جاى وأنا أكاد أقع من التعب وقلة النوم طيب يا ربي ح الحق أأخذ حمام من الحر الفظيع ده ولا أجهز الغداء ولا أرتب البيت فسيادته لم يرفع حتى أطباق معركة الفطار الصباحية ... لم أعرف ماذا أفعل فوقفت في منتصف الصالة وصرخت ( تعاااااالى لي يااااااااااامامااااااااااااا !!! ) .
يُتبع إن شاء الله .