ملتقى المهندسين العرب - عرض مشاركة واحدة - :: يـومـيـات أثنـيـن مـتـزوجـيـن :: ( عمر وسارة ) ماتعة ومفيدة جدًا جدًا ( لا تفوتك )

عمر بن رحال · #8 (**permalink**) 16-05-2008, 11:01 PM

الحلقة السادسة

أنا ذنبي أيه في الحرب ديه يا ربي ، كان مالي أنا ومال الجواز وشغل الحموات ده !! ، يا ربي ساعتين من لوى البوز - التكشير - من حماتي المصونة وتبريرات طويلة عريضة من سارة ومني حتى مليت في الآخر ، أمال لو كنا قتلنا قتيل كانت ماما وحماتي عملوا فينا أيه ؟! بجد كنت مفروس من حماتي ، وسارة عمالة تراضيها وتصالحها وكنت ح اعمل مشكلة بس قلت يا واد مش من أولها كده أعقل ربنا يهديك ، يا رب الواحد يفضل محتفظ بأعصابهِ على طول وما يعملش مصايب .
فكرت في كل هذا ؛ وأنا أقود السيارة إلى منزلنا أنا وسارة ، وأنا أقاوم النوم باستماتة بعد الحرب العالمية التاسعة اللي كُنَّا فيها ، والتفت إلى سارة وجدتها قد نامت بالفعل من شدة الإرهاق الجسدي والعصبي ، وصلنا إلى البيت ولم أشأ أن أوقظ سارة إلا لما أفرغ الحقائب من السيارة أولاً ، وأوصلتها إلى الاسانسير ، ثم أيقظت سارة بهدوء وكعادتها انتفضت وصرخت ( أنت مين ؟ وأنت خاطفني ولا أيه ؟ يااااعوماااااااااار )
وقبل أن تكمل استغاثتها الدولية برجال المطافئ ، وتفرج علينا الشارع ويفتكروني خاطفها وضعت يدي على فمها ، وانتظرت أن تتعرف عليَّ ، والحمد لله أخيرًا ، فاقت وعرفتني وسألتني سؤال أغرب من الخيال ( أيه ده عمر؟ ايه اللي جابنا في المنطقة المقطوعة ديه ؟ !!! .
-
-
-
-أنا ح أموت من التعب لو رسموا لي مخدة على الحيطة ح أنام فورًا !!! عاوزة أنام حالاً علشان بكرة الجمعة ؛ وبعده السبت حنرجع على شغلنا أنا وأنت يعنى بكرة يوم كله شغل وتجهيز أكل للأسبوع كله وتوضيب الشقة وأكيد ح نتعب بكرة أوى .
ح نتعب ؟ أيه الكلمة الغريبة ديه ؟ وأنا مالي أنا ؟
- مالك إزاي ؟ مش إحنا اتفقنا نتشارك في كل حاجة ؟
- يا سلام اتفقنا أخرط لكِ البصل ، وأمسح الأرض أيه يا بنتي الأوهام ديه ؟
- أوهام يا سلام هو لما تساعدني تبقى عايش في الوهم ؟ أمال أنا حبيبتك إزاي ؟
- يا ستِ حبيبتي وروحي كمان ؛ لكن اللي أنتِ بتقوليه ده أنا لم أقدر عليه أبدًا ، ولا
يمكن ح يحصل وده آخر كلام عندي في الموضوع ده .
- كده يا عمر ؟
- أيوة كده وياريت ننام بقى قبل ما نتخانق
- هو إحنا لسه ما اتخانقناش – نتشاجر - !؟ ... طيب تصبح على خير ، في حفظ الله .
يااااااااا سلام على رواقة الرجالة ، بعد الغداء أخبرني أنه نازل يقابل أصحابه وبعدين سيمر على والدتهِ وح يتأخر ولما أخبرته أنى ح أعمل أكل الأسبوع نظر لي باستغراب وقال لي طيب مع السلاااااااامة !!! بجد أنا زعلانة منه طيب يا عمر لما ترجع !! .
لازم سارة تتعود أن كلامي يتنفذ ، ولما أقول مش ح أساعد يبقى خلاص ... لازم تتعود على كده ويبقى هو ده نظام الحياة بيننا ح تزعل شوية في الأول وبعدين خلاص ح تتعود .... مع أنى مش هاين على زعلها ... طيب أكلمها على الموبايل بعد شوية ...
لا أجمد بقى يا عمر لو أتعودت إنك تساعدها في كل حاجة حيبقى حق مكتسب ولو ما عملتوش حنروح النيابة !!! لا وعلى أيه تزعل شوية وخلاص طيب أنا مفروض أعمل أيه دلوقتي بالظبط ؟ ، أنا الأول أرتب الشقة لأن التراب من قفلتها أسبوع يترسم عليه خرايط ولسه ح أفضى الشنط ، وأغسل الهدوم اللي كانت معانا في إسكندرية وبعدين أطبخ كذا صنف أشيلهم في الفريزر علشان يكفوا الأسبوع كله .

يا رب يخليكِ لينا يا ماما كنتِ شايلة الهم ده كله عنى ، وأنا كنت أتنح أمام التليفزيون ، ولا أرغى في التليفون وخلاص ... والاهم إن معلوماتي عن الطبيخ محتاجة مترجم يفك رموزها الهيروغليفية ربنا يستر .!! .
طيب أنا أحط اللحمة تتسلق الأول علشان بتأخذ وقت وبعدين أشغل الغسالة ...
بس لازم البس جوانتي علشان ريحة البصل علشان عمر لما ييجى ، ولا ليه خليه يشم البصل مش هو اللي سابني في الحرب ديه يستحمل بقى ... !! .
هي اللحمة شكلها غريب كده ليه ؟ ... طيب مش مهم أعمل أيه تاني ؟ مسقعة ؟ يا سلام ده أنا بموت فيها بس عمري ما شفت ماما بتعملها إزاي ؟ هي فيها باذنجان وحاجات تانية غريبة !!!.............. يامااااااااما الحقينى وجريت كلمتها على التليفون وقعدت تهزأ في الأول إنها كثيرًا قالت لي أتعلم ومفيش فايدة الخ الخ الخ المهم إنها قالت لي الطريقة مع استخدام ألفاظ غريبة ( تعملي اللحمة ع الصاج الأول !!! ) أجيب منين صاج دلوقتى يا ماما ؟ وطبعًا يصحب هذا وابل من التريقة والدعاء لعمر بالصبر على ما ابتلاه !!! .
وطالت المكالمة ساعتين وماما تشرح لي كأن كلامها كله طبيعي ومفهوم وأنا من كثرة التريقة اللي خدتها ، لم أسأل على أشياء كثيرة وقلت أعتمد على خيالي الخاص !!!
وتوكلت على الله وبدأت المعركة الحقيقية أضرب الطماطم لا أسلق المكرونة الأول .
طيب أقطع البطاطس شرايح ، ولا قطع أنا بأقول مثلثات وخلاص !!! أيه حدوتة الملوخية ديه لازم أقعد أخرطها ساعتين لا حأهريها – حسويها - في الكبة وخلاص بس مش عارفة تكورت كورة صلبة في قاع الحلة كده ليه ؟
صينية البطاطس وضعتها في الفرن مباشرةً بس حاسة أنى نسيت حاجة فيها هي ليه ما لسه صلبة رغم أن بقى لها ساعة ونصف في الفرن ، والقاع أتحرق ، ومع ذلك لسه ناشفة ... يا ربي أيه الوقعة ديه كان مالي أنا مأنا كنت أميرة زماني وآخر رواقه ... خلاص اللي أتعمل أتعمل طيب لو عمر أتكلم ؟؟؟؟؟؟؟!! .
ييييييييييييييييه أنا نسيت الغسيل طلعت البلكونة أنشره ، وقعدت أفتكر أيه بيتنشر الأول ، وأيه اللي وراء ؟ طيب أيه من رجله وأيه من قفاه ؟ أيه الفيلم ده دول الستات دول ناس رايقة ، ما كله ح ينشف وخلاص ولاحظت وجود سيدة أروبة عينها عليَّ في البلكونة تراقبني كي ترى العروس الميمون اللي هي أنا ح تنشر إزاي ؟ ولا هممني من نظراتها وعملت كرنفال من الهدوم: ابيض على احمر على اخضر وأديله المهم ينشفوا وخلاص !!! .
ورجعت للكارثة الموجودة في المطبخ ، وتذوقت ما طبخته وصرخت ياللهول !!! طيب والحل ، وفتحت الفريزر لأجد ماما حبيبتي وكأنها عرفة المصيبة اللي ح أعملها واضعة كمية كبيرة من أكياس الهامبورجر والدجاج النصف مقلي ، والطبخات السريعة الحمد لله كنت ح أطلق وأنا لسه في شهر العسل !! .
يااااخبر ده عمر بيرن على الموبيل إذن هو في الطريق وطبعا ملابسي لا توصف من القنابل اللي كنت بعملها في المطبخ كرنفال من البصل والثوم والزيت ... لميت الكوارث اللي عملتها ووضعتها في الثلاجة ، وجريت على الحمام وأزلت آثار العدوان وغيرت ملابسي ... أمال هم بييجوا في التليفزيون بيطبخوا ، وكأنهم رايحين سهرة ليه ؟
ودخل عمر وبسرعة أظهرت البوز المتين على غلاسته معايا قبل ما ينزل وانتظرت أن يأتي يصالحني كالمعتاد ولا فائدة .... ثم لاحظت أنه متعب ويتنفس بصعوبة فجريت عليه أنا وقلت له ( مالك يا حبيبي ... أنت تعبان ؟ ) وأخذت أمسح له عرقه وأسقيه الماء وأنا أكاد أبكي ( وأقول له إنشاء الله أنا وأنت لا يا حبيبي ) وأنا ممسكة يده الضعيفة وفجأة ... اشتدت قبضته على وجذبني له وضحك بقوة وقال ( لما أنتِ بتموتي فيا كده ما تكشريش أبدًا في وشى اتفقنا ؟ ) .

يُتبع إن شاء الله