 فيه ملحوظة مهمة يا إخوانا أنا نسيت أذكرها لكم طبعا أكيد الكل عارفها بس هأذكرها لكم من باب التذكير بها
وهى : ان رخصتك بتاعة المصنع اللى هتطلعها بتطلعها لو انتا أول مرة هتفتح مصنع فى مجالنا ده :
باسم : خلط وتعبئة وتوزيع المنظفات الصناعية والمطهرات
اما لو انتا فاتح مصنع تانى فى أى مجال تانى وعايز تشتغل فى مجالنا ده ( تزود نشاطك ) بتضيف تقريبا فى الرخصة النشاط الزيادة اللى هو بتاعنا اللى بنتكلم عليه او بتعدل تقريبا الرخصة انا مش متذكر صراحة
وبنكتب خلط وتعبئة وتوزيع المنظفات الصناعية والمطهرات دية علشان ترخيص المصنع وابعد عن ان انتا تضيف كلمة تصنيع فى الرخصة لإنك كده هتوقفها مش هتطلع ليك لإن اللى بيضيف كلمة تصنيع ويكتب فى الرخصة : خلط وتعبئة وتصنيع المنظفات الصناعية والمطهرات ده بيكتب كده ليه علشان يطلع السجل الصناعى فعلشان يطلعلك سجل صناعى لازم تكتب كلمة تصنيع وطبعا السجل الصناعى طلوعه صعب ومواويله كتيرة واش فى طلوعه شغلانة واش فى واش وبعدين السجل الصناعى عايز المناطق الصناعية غير المناطق الصناعية صعب يطلع لإنه عايز تصريح للأرض نفسها اللى هيقام عليها المصنع أما المصانع اللى فى المبانى وغيرها مش بيطلع ليهم سجل صناعى وخاصة فى الأيام دية إلا بقى اللى بيعرف يسلك نفسه ويدفع وليه واسطة طبعا انتم فاهمين كلامى
كان زمان السجل الصناعى سهل اى حد بيطلعه فى التمنينات
وعامة عايز اقولك على حاجة السجل الصناعى ملوش لازمة فى شغلنا غير فى حاجة واحدة اما اجى اتكلم على الخامات اللى هنجبها من الكوك نبقى نذكر فوائده
وتلات تربع الشركات اللى شغالة فى مجالنا ده شغالة من غير سجل صناعى وشركات كبيرة وليها اسمها فى السوق اهم حاجة انه يكون معاك رخصة المصنع والسجل التجارى والبطاقة الضريبية لإن مشاكلك كلها مش مع السجل الصناعى مشاكلك بتبقى مع بتوع البيئة ومباحث التموين لو منتجك مغشوش فى السوق كله ماية مثلا ومرسب تاريخ صلاحيته انتهت حاجات زى كده ممعكشى سجل تجارى مثلا وحاجات زى كده مش مرخص المصنع اما كونك فاتح فى الأرياف فى المدن فى شارع فى حارة فى وسط مجمعات سكنية عادى طالما مرخص خلاص ومنتجاتك سليمة خلاص مفيش اى مشكلة هتقابلك
وبعدين معظم المصانع والشركات دلوقتى فى مجالنا او فى اى مجال تانى من اللى شغالين فى المدن وسط المجمعات السكنية شغالين عادى بقالهم سنين ومن غير سجل صناعى وانتا خبير بكده وشايف ان المصانع كترت دلوقتى داخل المدن وفى الشوارع والحوارى وسط السكان
وانتا لما تشتغل فى مجالنا ده ان شاء الله هتشوف بنفسك شركات معدودة على الأصابع اللى معاها سجل صناعى زى شركة العالمية للمنظفات ( فنيك العاشر ) وزى شركة النيل للأدوية ( فنيك عابدين ) وزى شركة الجمهورية وزى شركة السلام وكام شركة كمان مش كتير لما تروح تشترى خامات إن شاء الله من الكوك هتشوف بنفسك وهتعرف انهم معدودين على الأصابع وهتلاقى معظم الشركات التانية بتاخد من الشركة من غير سجلات صناعية لما نيجى نتكلم عن شراء الخامات هنفصل فى المسألة دية
أهم حاجة بس اللى عايزك تعمله انك لما تعمل بطاقة ضريبية تكتب فيها كلمة تصنيع منظفات صناعية ودية سهلة عادى مفهاش مشاكل ولو عندك بطاقة ضريبية بتاعة مجال تانى ضيف فيها بس كلمة وتصنيع منظفات صناعية بدل اما تطلع واحدة تانية ضيف فيها بس كلمة وتصنيع منظفات صناعية
يتبع إن شاء الله
التعديل الأخير تم بواسطة ممدوح الجيار ; 04-05-2008 الساعة 07:26 PM.
|