المشاركة الأصلية كتبت بواسطة md-salem

السلام عليكم و رحمة الله وبركاته
انا عضو جديد جدا فى هذا الموقع , وفعلا شئ عظيم ان نجد مثل هذه المواقع العربية التى تتيح للمهندسيين العرب سواء كانو شباب ام كبار ان يلتقوا ويتشاركوا الخبرات والمعرفة من اجل تطوير انفسهم وبالتالى الارتقاء بمستوى المهندسيين العرب . الف شكر للعامليين على هذا الموقع والمساهميين به , جزاكم الله كل خير
بالنسبة السؤال المطروح
انا خريج 2000 عملت عمل حكومى مكتبى لمدةسنتين ثم اتجهت للعمل باحدى الشركات الكبيرة
يعنى لسه خبرتى على قدى والكلام اللى زملاؤنا ارسلوه اكثر من رائع واحب ان اضيف له الاتى :
1- حاول تتعلم من العمال و بالذات الصنايعية الكبار اللى معاك اسرار كل صنعة -طبعا بدون رفع التكليف بينك وبينهم - صدقنى حتتعلم كتير اوى عن كل صنعة
2-لو حضرتك بتقوم باعمال حفر عميقة ( اكتر من 5 م ) لازم تراعى نوع التربة وكيفية الحفر الأمن ( بدون حدوث انهيارات فى جوانب الحفر) يعنى مثلا تقوم بعمل جوانب الحفر على شكل مصاطب ,عرض المصطبة وارتفاعها يعتمد على نوع التربة كلما زادت قوة التربة كلما زاد ارتفاع المصطبة وقل عرضها . او استعمال سواند لاجناب الحفر ( حوائط ساندة مؤقتة من الطوب او الاخشاب او sheet pillingاو اى اسلوب طبقا لنوع التربة والعمق المطلوب ومكان الحفر والامكانيات المتاحة
3-لاتنسى استلام المواد بدقة واسلوب حساب كل مادة يعنى مثلا :
-الاسمنت لو شكاير يبقى بالعدد , اما لوكان سايب يبقى لازم تتاكد ان فتحات خزانات الاسمنت متبرشمة برشام المصنع و ان بيانات اليصال اللى مع السائق مضبوطة بالنسبة للعربية وتبتدى تحفظ كل عربية حمولتها قد ايه وبتملى لحد فين من خزانات السمنت فى الخلاطة المركزية ( تقدر تعرف منسوب الاسمنت فى الخزانلت ببساط , اطلب من احد العمال الصعود على السلم الخارجى للخزان والتخبيط على جدران الخزان -طبعا الفاضى حيرن اكتر من المليان)
- الطوب بالعدد مع مراعاة نسبة الهالك ( فى الطوب العادى 20% ولكن فى بعض انواع الطوبالمفروض ان تكون نسبة الهالك اقل -و بالتالى تكون اغلى -لازم تبقى عارف النسبة دى و تتاكد ان الهالك لايتجاوز النسبة المفروضة
-بالنسبة للحديد انا كنت استخدم طريقة بسيطة و هى عمل حساب وزن السيخ لكل قطر حديد و 2عمال يعدوا السياخ ويبلغوك تقدر ساعتها تعرف وزن الحديد المستلم
-الركام بالمتر المكعب يعنى عرض صندوق العربية x الطول xالارتفاع
الخشب بالمتر المكعب
4- بالنسبة لجودة المواد راجع كتب الكلية فيها الشفا الى ان تكتسب الخبرة الكافية للحكم على المواد
5- لازم تكون فكرة عن المعدات الثقيلة اللى معاك فى الموقع بغض النظر عن وجود مهندس ميكانيكا لانك المسئول عن تحديد الشغل المطلوب منها ( وعيب يا بشمهندس ان سائق المعدة يظهرك كانك لا تعلم شئ عن المعدات)
6-خلى بالك من اجراءات الامن الصناعى ( كتتتتتتتتييييييييييرة قوى)
7-لا تتردد فى سؤال من هو اكبر منك لم يولد اى مهندس و هو خبيير
8- لاتتردد فى ان تكون حمبلى اذا لزم الامر ( لان للمهندس سمعة بيبنيها من اول يوم عمل )
9-المراجعة الدقيقة لمقاسات اعمال الشدد لان بعض المقاوليين يلجأ لتقليل المقاسات للتوفيير( 10 سم فى اى شدة تفرق كتتييييييير , صدقنى )
10- بالاضافة لكل ما اخبرك به زملائى ....................................... الف مبروك
ملحوظة : ارحب برسائلك و لا تتردد فى السؤال اذا واجهتك اى مشكلة